شيخ الأمين يكشف المثير.. وقت إشتريت بيت في لندن الدعم السريع ما أسسو

أثار الشيخ الأمين عمر الجدل مجدداً بحديثه عن الدعم السريع وقال في حوار مع أصداء سودانية أن الحديث عن دعم الدعم السريع لتكايا شيخ الأمين، غير دقيق، مبيناً أنه لديه عدد من الإستثمارات الخاصة التى يساهم بها في دعم المسيد، وأضاف: والله أنا لما إشتريت بيت في لندن الدعم السريع ما كان اتكون، وكشف شيخ الأمين تفاصيل زيارته الى قطر برفقة عدد من محبيه لحضور كأس العالم، وأقر شيخ الأمين خلال إجابته على الصحفية داليا الياس في الحوار بتغيير نهجه في الدعوة عبر جذب الشباب بطرق حديثة وأكثر عصرية.. مبيناً أن الأطفال يتابعون الميديا ويعرفون كرستيانو رونالدو ومشاهير كرة القدم ولا يعرفون اسم والدة رسول الله.. إليكم الحوار

قيام كأس العالم في قطر نصرة للإسلام

شيخ الأمين..لدي مدارس انجليزية و داخليات وعملت شركة في دبي

في ناس عينهم زي الذبابة ما بترك الا في الأوساخ وناس زي النحل

إحتفالكم بالمولد مختلف تماما؟

نعم نحن نحتفل بطريقة مختلفة، الشفع الصغار بكونو منتظرين المولد عشان حلاوة المولد، والطفل لو سالتيو كرستيانو بلعب وين بوريك و برشلونة وريال مدريد بعرفوهم ، وتسكيل اللعبية بيكم، وكدا.. لو قلتي ليه الطفل الرسول صلى الله عليه وسلم امو اسمها منو ما بعرف، لأنو نحنا ماخدين الدين بالطريقة القديمة، ونحنا الأن في عالم الذكاء الإصطناعي مافي زول بشيل تلفون نوكيا القديم، وهسي الليلة لو دايرين الدين القديم الا يشوفو الناس الكبار، والشباب سرقتو مننا الميديا و المخدرات و اللهوة وتلقي ولدك قاعد في البيت بلعب لعبة مع زول في أمريكا دا تجي تقعدو في الواطة وتقولي ليو الدين قتل.. الرسول صلى الله عليه وسلم بقول بشروا ولا تنفرو، يسرو ولا تعسرو ، وقبل كدا جو قبيلة للرسول قالو ليو نحنا دايرين ندخل الإسلام ومادايرين نحج قال ليهم تمام، وما دايرين نصوم ومادايرين نصلي ، قال ليهم لا، قالو ليو ما حنصلي الخمس صلوات كلها وكان قاعد جنب الرسول سيدنا عمر وماعجبو الكلام قال ليه يارسول الله كيف كدا وأعلنو إسلامهم ومشو وكان في قبيلة ماشة الحج، وشافوهم الجماعة الأسلمو ديل قالو ديل مسلمين ماشين الحج نحنا زاتو نمش الحج قبيلة منافسانا تصلى خمس أوقات ونحن كمان نصلي خمس أوقات وبي نوافل، القبيلة دي تدفع زكاة ونحنا ما ندفع قالو لا ندفع هم أحسن مننا في شنو ولما عادو الى رسول الله، وجدهم فعلو كل هذه الأشياء لذلك الترقيب مهم ، والجيل الحالي لو جيت قلت ليهم حلال وحرام بمشي يخليك ، زمان كان الأبو والعم والخال كلمتهم نافذة هسي النفوذ في الميديا يا أما نحنا نتواضع وونزل عشان ننهض بهم أو نكون متعاليين وهم يضيعو مننا، وتاني جيل جيلين يضيعو مننا

على ذكر سيرة كرستيانو ومحاولتك لتوظيف الحداثة و الميديا في أمور الدين سقت مجموعة كبيرة من شباب السودان وديتهم كاس العالم بطائرة خاصة وتكفلت بكل إقامتهم.. القصة دي وراها منو وتفاصيلها شنو ؟

أول حاجة أول كأس عالم يكون في دولة عربية ودا نصر للإسلام، وأول كأس عالم يبدأ بالقرأن الكريم وأول كاس عالم يشرحو فيه الأيات وأول كاس عالم يستدعو فيه  العلماء من جميع الدول، وللأسف كل الدول كان مشاركة، ومبسوطة بالمشاركة الا نحنا بنتريق في شيخ الأمين الساق الناس.. هل كاس العالم فيه حرمة، كاس العالم أسلم فيه ناس كتار جداً، وخلى الغرب يعرف أنو في صوت بطلع إسمو الأذان وتتوقف الكورة ، والغرب كان ببحث عن ما يفعله المسلمين، كاس العالم حضرو شباب مسلمين كتار جداً ولما شافو نحنا وصلنا ومشاركين تغيرت الصورة الذهنية عن الطرق الصوفية البقعدو في الواطة، وفي ناس إنضمو لشيخ الامين وأديتهم حقن سيسي سيسي الما بصلي بقا يصلي بعد شوية بقيت اعمل ليهم دروس دينية صغيرة صغيرة عن شجاعة الرسول وكرمه وأحببهم فيه وهم بقو يفتشو عنو وكيف نصر الدين ، وحببتهم في الرسول و القصة نجحت نجاح كبير، وفي ناس عينهم قدر الذبابة،والذبابة والنحلة بتشابهو والنحلة بترك في الزهرة وبتنتج عسل فيه شفاء اما الذبابة بترك في الاوساخ و تنتج مرض في ناس، ودايرين يشوهو سمعة الناس وديل مريضين نحنا لمينا الشباب ومثلنا السودان، ولاقيت شيخ من المغرب والناس كانو مبسوطين ، وفي ناس عين الذبابة ما عندهم كتيرة لكن الحمد لله أتت أكلها والأمور مشت والشي الدايرنو بقا

 تنفق أموال طائلة .. ماهي مصادر تمويل شيخ الأمين للمسجد و التكية وغيرها.. من أين لك هذا ؟

شيخ الأمين لما بدا التجارة من أوائل الثمنينيات في السوق العربي و انا اول من جاب شركة فرنسية لتنقيب الذهب في السودان ، عام 2013م وقامو قالو دا شيخ  شنو ساكي الدنيا وساكي شنو، شيخ الأمين عندو مدارس انجليزية وعندي داخليات وأنا اول من إشتغل في دبي انترنت ستي وكان معاي شركاء و دخلت في مجال المباني ، لكن التجارة كنت مغطيها بالمشيخة ما كنت داير أظهر و أشتهر بالتجارة ، داير ألم الشباب بقدر الإمكان ، وحكاية الشيخ يغمتو لي دي ما دايرة داير الشيخ هو اليغمت للناس، والحمد لله ربنا فتح لينا أبواب كتيرة ، والجامعة كانو بقولو لي بصرفو عليك ناس الدعم السريع بقول ليهم والله انا لما اشتريت بيت في لندن الدعم السريع ما كان اتكون ، والحمد لله بصرف على نفسي وربنا ببارك لي