شقيق الفنان الحوت يوجه رسالة مؤثرة للأمبراطور

متابعة – منصة السودان –

وجّه مامون عبد العزيز، شقيق الفنان الراحل محمود عبد العزيز، رسالة مؤثرة للفنان أحمد الصادق عقب حفله الأخير الذي شهد عودة قوية له بعد غياب طويل عن المسارح.

وحسب متابعات صحيفة النهار السودان قال مامون في حديثه إن ما دفعه للكتابة هو حبه للفنان أحمد الصادق وخوفه عليه من الوقوع في نفس الأخطاء التي – بحسب قوله – أثرت على مسيرة الراحل محمود عبد العزيز.

واستعاد مامون ذكرى قديمة قائلاً: “في يوم من الأيام، وفي حلقة شهيرة في التلفزيون القومي أيام العيد، غنّى محمود وصوته كان تعبان… وكل الناس حوله كانوا يطبطبوا عليه ويقولوا (غنيت كويس)… التطبيل دا هو البضيع الفنان.”

وأضاف أنه بعد الحلقة واجهوا غضب جمهور محمود في الحي، وهناك اضطر لأول مرة في حياته أن يقول للراحل بوضوح:

“غنيت كعب… قلتها وأنا ببكي، ما عشان أجرحو، لكن عشان بحبو.”

مامون قال إن الجمهور يستحق دائمًا أن يرى الفنان في أحسن حالاته، وإن حب الجمهور أمانة لا تتحمل الاستهانة.

ووجّه رسالته مباشرة لأحمد الصادق قائلاً: “أحمد الليلة شفت محبة الناس ليك قدر شنو… دا جمهور وفي، جمهور ما بخذلك… الجمهور البتشوف فيهو القوة لازم تعمل المستحيل عشان تحافظ عليه.”

وأضاف: “ما تسمع كلام الناس البقولوا ليك (عاوزينك كده)… وعاوزينك في أسوأ حالاتك… الكلام العاطفي ده بضيع الفنان. نفس الكلام ده كنا بنسمعو لمحمود… للأسف ما كان بسمع.”

وختم رسالته برسالة وجدانية:

“نحن كأسرة الراحل محمود عبد العزيز بنحبكم انت وحسين محبة في الله… وعاوزنك تكون أحمد الصادق الحقيقي… الصوت الجميل… الفنان الموهوب… وحافظ على صوتك وصحتك ومحبتك عند الناس.”

 هل تتفق مع رأي مامون عبد العزيز أن «المجاملة والتطبيل» يمكن أن تضيع الفنان… أم أن دعم الفنان في كل حالاته واجب على الجمهور؟.