صحفية تُهاجم شركة جياد.. لا عربية ولا تكتك!

كتبت الصحفية صباح احمد مقال مثير على صفحتها في الفيس بوك وجهت عبره انتقادات لشركة جياد ، بعد تعرضها للاحتيال عقب نشرها اعلانات للشركة ولم تلتزم الشركة بدفع مبالغ الاعلان

اليكم نص المقال :

في عز الزنقة والفلس العايشة فيه ده في ناس كتار بقترحوا علي انزل اعلانات في الصفحة نظير مبلغ مالي محدد ..المعلن يستفيد من الصفحة وانا استفيد من العائد الاعلاني..

بس الماعارفنو الناس البنصحوني ديل إنو انا قصص الإعلانات ما بعرف ليها من زمااان ما من هسة وطيلة فترة عملي الصحفي الاتجاوزت الـ20 عاما واقترب من ربع القرن ماحصل اشتغلت شغل إعلانات..ياهو الشغل الصحفي العام التحريري دة بس ..لكن الشغل الاعلاني والتسجيلي لا بعرفه ولا بفهم فيه ويومي القررت انزل إعلانات في صفحتي طلع شغل ماسورة وناس “جياد ” الاعلنت ليهم قرش واحد ما ادوني ليه ..

سبحان الله اتواصل معاي صديق للصفحة قال لي ناس جياد عندهم حملة إعلانية عاوزينك انتي وشيخ الهادي تكونوا جزء من الحملة دي باعتبار صفحاتكم مؤثرة وفيها متابعين كتار. وطلب رقمي ورقم شيخ الهادي.

العرض دة جاني في جرح..كنت مفلسة شديد وحق الايجار ماعندنا وداخلة الفيس زاتو مجاني .وافقت طوالي خاصة وانو جياد شركة ماساهلة وعندهم قروش..يعني كنت داخلة علي طمع..

وبالفعل اتواصل معاي زول اسمه معتصم عبد الله قال انه إعلام شركة جياد وعندنا شغل معارض وافتتاحات تنزلوه لينا في صفحتكم..اتواصل معانا في وقت واحد

وكان برسل لينا نشرات الاعلانات..بدء من افتتاح معرض بورتسودان ونهر النيل ..ولغاية تحرير جياد نزلناه ليه ..واي خبر نلقاه عن جياد كنا بننشره ونرسل ليه الرابط..وغير الفيس شيخ الهادي كان بنشر ليه في تطبيق لنكدين وتويتر ..وكتير كنا بنعيد صياغة الاعلانات لمن نحسها تعبانة..

انتظرنا بعد داك يتحرك ويدينا حق الاعلانات.. ما عبرنا زاتو .. والغريب كان بقرا رسايلنا.. ولمن اتكلمت معاه قال هو مسؤول عن شغل المعارض بس ما عنده علاقه بباقي الاعلانات التانية قلنا ليه ماشكلة وين حق الاعلانات الاشتغلناها ليك ..وبتذكر قلت ليه أدي شيخ الهادي حقه وانا اديني حقي تكتك..

ضحك وقال لي مفروض يكون طموحك اعلي من التكتك. قلت خلاص معناها عربية ..ان شاء الله مورينغ علي اسمي .بس وحاتكم لحدي اليوم لا جنيه. ولا تكتك ولا عربية..ولا شُكر ما شكرنا ليه..ولمن رجعت للزول الوسيط بيناتنا كلمته وطلبت منه يساله ويتفاهم معاه قال لي بيقرأ رسايلي وما برد عليها..وياريت ما تكتبي عن الموضوع دة أو تثيريه ..زعلت قلت ليه اتحاملت علينا وناصرت زولك ووقفت معاه رغم انو نحنا مظلومين ومحتاجين وهو ظلمنا واكل جُهدنا

حكينا القصة دي ليه ؟!

 عشان اوريكم السبب في رفضي اني انزل إعلان.. لانو قررت تاني اقفل باب الاعلانات دة تماما ..لانو الاحباط والصدمة الدخلت فيها من وراء الموضوع دة كرهتني حاجة اسمها إعلان ..